لغن الحسانس

أمْنَـادِمْ بَعْـدْ الـرَّبْ اهـداه=====للتوفيـق وخَـرَّصْ مَـبْـداه
وانظَـرْ فَامْـرْ وتصريـف الله=====فِالظَّاهـر مـنُّ والْ خافـيـه
وافْ تصويرُ فِمْنـاشْ انْشَـاه=====وتَحْسِيـنُ بِلْحِسْـن امْسَوِّيـه
يعـرفْ عَـنْ ذَ تدْبيـرْ إلَـهْ=====قـادر مُريـدْ وعِلْـمُ بـيـه
عالِـم بِـلِّ رايـدْ حَـشَـاه=====امْنْ اجْهَـلْ شِ لاشْ امَّاسِيـه
مَدَارْ افْ ذَ الكَوْنْ امْنْ اسْمَـاه=====وارْضُ وابْحُـورُ وانْواحِـيـهْ
واوْسَـاطُ گِدْ اظْفـرْ وَسَـاهْ=====مـاهُ عالِـمْ بِــلِّ يِـزِّيـهْ
وبالْحِكْمَ فيـه امنيـن انشـاه=====وبِـلِّ يَوْخَـظْ زاد وينفـيـه
وتدبيرْ امْرْ الْمَخْلـوق ارْعَـاه=====من مَـزال اغشـاه امْغَشِّيـه
صَنْعُ من ذاك الشِّـي وسـاه=====بِذْكُـورُ مِــنُّ وابْناثِـيـه
وكِلْ امَّـلِّ لَشْخَـاصْ ابنـاهْ=====من تِشْتات اجناس امْخَاويـه :
جنس اعْظَامْ امْسَيَّرْ ، واكْسَاه=====ابْجِنْسْ الْحَمْ لِيِّـنْ كاسيـه ،
وجنس اعْصَبْ شدَّدْ بيـهْ الله=====العِظَامْ ، وكـل اعْظَـمْ فيـه
قَـدَّرْ لُ تركيـبْ وقَــوَّاهْ=====زادْ ابْمـخْ اتَـمْ امْلَوْمِـيـهْ
والـدَّمْ افْ ذَ كَامِـلْ جَـرَّاه=====ما يِسْكِـنْ فِجِّـرْمْ امْجَرِّيـهْ
ومِن عظيم اصَّ قُـدْرِتْ گاعْ=====مالك ذَ المُلْـكْ ابـلا نـزاع
ولاهِ تِـرْگِيگَ : لَخْـتِـراع=====لِلْكَوْنْ امْـنْ العَـدَمْ ناشِيـه ،
وترْكيبُ لِلـدَّمْ ، وتِصْـراعْ=====الروح افْ ذَ الهَيْكَـلْ تِحْييـهْ
مـا تـورَ ذاتْ ولا سِمَـاع=====حِسْ ولا حَسْ انْحَسِّتْ بيـه
وهـيَّ مَوْجـودَ شِيـخَ گاع=====ماهِ مـن شِـي لِعْقَـلْ ينفيـه
واخبَـرْهَ ظاهـر بالتِّگيـاع=====ودَارِگ زادْ امَّــلِّ خَلِّـيـهْ
وبِجِّـرْمْ الِّ عُمْـدِتْ مَبْنـاه=====الْحَمْ واعْظَمْ واعْصَابْ ابْنـاه
الْ لِعْقَـلْ واحْـنَ خَرَّصْنـاه=====غَلْبِتْـنَ حالـت لِعْقَـلْ فيـه
لِعْظَمْ ما يَعْقَـلْ شِ ، وامْعَـاهْ=====لِعْصَبْ مـا يَعْقَـلْ شِ يِزِّيـهْ ،
واللحْـمَ مـا تَعْـقَـلْ ، واللهْ=====واسَ لِعْقَلْ للشَّخْـص ، وبيـه
عَرْفْ الشخـصْ انُّ ذَلِّ طـاهْ=====لِعْقَـلْ قـادر حَگْ وعاطيـه
بَلْ اظْواگ ونطـق ومَمْشَـاه=====ابرِجْلَيْـه اصنَعْهُـمْ ، وايديـه
اصنعهـم لُ ، هـاذَ وسـاه=====سابگ يِخْـلِگ مُكَـرَّمْ بيـهْ
وامنين اخْلِگْ مـاجَ مَتكـولْ=====اعـلَ راصُ عـنُّ مَغْفُـول .
كيفن يِخْلِگْ يِخْلِگْ مَجْعُـول=====خَلْـقْ اعليـه اليـن ايرَبِّيـه
مِتمَوْنَكْ باللُّطْـفْ المَسْبُـول=====مقـهـورَ لُ مَــدَّ تبغـيـه
ماهُ بِخْزيـنْ اگْبَـلْ مفعـول=====ألا قَـهْــرْ اللهْ امـاسـيـه
وكَرْمُ بِدْرارْ البَـنْ مَـصْگولْ=====ما يِتْوَخَّرْ عن وقـت امْجيـه
ولا يعجل عن ذاك ، ألاَّ گُولْ :=====مِتمَيْعَـدْ وَيَّــاه ايْحَانـيـه
حاصلْ فِ امُّ فِبْلَـدْ مَسْبُـولْ=====مَگْدُودْ اعْـلَ فـمُّ راضـيـه
مـاهُ مَقْلُـوگ ولا مَحْلـولْ=====حَـلْ ايعـودْ ابَّـجُّ يـوذيـه
ألاَّ گِدْ المِـنْـيَ مَـبْــذُولْ=====واعْـلَ نَفْـعُ فيـه امْسَهْديـه
ووسـاهْ الگِدَّامْ اعْـلَ مُـولْ=====الـرِّعْـيَ لَـيَّـاكْ ايتَكِّـيـه
مِتمَوْنَـكْ فِلْعَبُّـون وطـولْ=====سِغْـرُ كامـلِ هِـيَّ تِرْعيـهْ
وامنيـنْ اكْبِـرْ مـاهْ انُّ زاد=====اگْلَـعْ عـنُّ لَيْـدْ انُّ عـاد
يَصْنَعْ شِي كيف اخْبَرْ وَجَّـادْ=====يَصْنَعْ شِـي فِصِّنْـعْ ايطَرِّيـهْ
هَـيَّـأ ْ لُ گدَّامُ سَـــدادْ=====نَفْـعُ فِدِّنْـيَ گبْـلْ ايْجِيـه
منها لَـرْضْ ابْسَطْهـا مِهـادْ=====ولا وسـاهَ جنـس ايژَيْگِيـهْ
وسالُ منهـا جنـس أقـرادْ=====تِـنْـزَاهْ ونَعِـيـم اتحـاذيـه
أجناس وتنبـت مـن مُـرادْ=====النـاس ولَنْـعـامْ الِّ بـيـه
وابْهَاذَ مـن كوكـبْ وقَّـادْ=====زيَّنْهـا للخَلْـقْ افْ عَيْنِـيـهْ
ويسهديه اف ظلمـت لبـلادْ=====بيهم و افْ لبحـور ايسهديـه
وفيها دارْ الـرزق الْ لَعْبـادْ=====ومنهـا رادْ امَّــلِّ يعطـيـه
وايجُـودْ ابلَمْطـار ولَـعـادْ=====مـاهَ زادْ افْ مَــرَّ يِلْقِـيـهْ
عَجْنَ تَجْعَـلْ ذَ الخلـقْ أمـادْ=====هُوَّ عالِـم لَـرْضْ ايسَوْگِيـهْ
بَـرْشـاشْ ألا گد الْـمُـرادْ=====اليـن ايجَـرِّ بيـه اسْواگِيـه
ويَمْلَ بيـهْ الْ حَاكِـمْ لَبْـلادْ=====وينَبَّـتْ جادِبْهـا يِكْسـيـهْ
وفيها بَـثْ انـواع الـدوابْ=====اركوبُ وامعايـش واشـراب
وَجْمـالْ التنـزاهْ ولَثـوابْ=====والبِنـايْ الِّ يـبـغِ يبنـيـه
وقِسْمَ للرزقْ اف كِلْ اتـرابْ=====اعْـلَ قَـدْرْ الخلـق اتحاذيـه
وقِسْمَ ما تِنـزاد اف لَسْبـابْ=====ولا ينگِصْ الْهَا شـي عاطيـه
ومن فَضْلُ لكريـمْ الوهـابْ=====وهــذا جَ بـيـه انْبِـيـه
الصَّـادق لَمِيـنْ الِّ جـابْ=====الدين القويـم ، وشـي بيـهْ
جَ كامل مـا فيـه التكـذابْ=====مُحالْ الكذبْ اعليهْ . اعليـهْ
صَلَّى اللهْ ، وهُـوَّ واصحـابْ=====نَصْـروهْ وسَـلَّـمْ عَلَـيْـهْ
وارحَـمْ مَوْتَـانَ والصَّـوابْ=====الــنَ فِلْخِـتـامْ اتوالـيـه
وامْعَـانَ لِخُّـوتْ ولَحبـابْ=====وجميـعْ الْمُسلميـن اتواسيـهْ
2
بـــرك جـمـلـك فالـعـافـيـة=====وَحـمَــد نعمـتـهـا ظـافـيــة

وازهـــد فالـدنـيـا وافــيــة=====عـنــك فَ ايــــام أكـلـيـلـة

أولا لاهـى تَـخـفَ خافـيـة=====عـــن ربـــك . مستحـيـلـة

وأحرث وخيرت أو كافيـة=====وأعــرف عـنـهـا فضـيـلـة

أو لا تعطـى نفـكـة حافـيـة=====وإيــــلَ لاحــــت لكـبـيـلـة

عود ألا كود أوعود صوك=====وَاهـرب مـن قــال اوقـيـلَ

لهـروب ألا كـبـل ألـحـوك=====أو وذن السلطـان أطويـلـة

محمد سالم ول هيبة